– Eg gler meg veldig til å kome heim for å spele. For som eg har sagt mange gongar før: Sjølv om eg har spelt over heile Norges land – på både små og store scener – så er det ingenting som slår det å kome heim for å spele, seier han til Fjordenes Tidende.
Artisten slo gjennom i 2014 og trykte samtidig heile Norge til sitt bryst då han kom på andreplass i songkonkurransen Idol på TV2. Sidan då har han slept fleire låtar og spelt tallause konsertar over heile landet, også heime i Måløy.
Men det er altså første gangen han står på scena i Refvik, og faktisk berre den andre gangen han er på festivalen nokon gang.
– Eg har som regel vore opptatt med egne spelejobbar, men i fjor fekk eg moglegheita til å oppleve festivalen som publikum. Det er jo rett og slett ein fantastisk festival. Med fare for å vere lokalpatriot, det er ingen stadar i landet som har ein så unik festival, seier han.
Men sjølv om han fekk den med seg i fjor, og no også i år, handlar ikkje det om at han hadde lite å gjere på. Snarare tvert imot.
– Fjoråret var heilt ekstremt hektisk med speling og reising heile tida. Slik ser det ut som at det kan bli i år også, seier han.
«Ka, ka, ka, ka e’ det som skjer?» Jo, Kjartan Lauritzen er klar for Strandfestivalen
Fleire lokale
Med Jørn Trollebø Kvalheim på plass, bekreftar festivalleiinga det som har vore målet sidan oppstarten i 2017.
– No har vi på plass både Andrea og Jørn. Det å ha med lokale artistar er noko som er veldig viktig for oss og som vi prøver å få med kvart år, seier Kent Rune Bugjerde i Strandfestivalen.
Og med siste artist på plass går han langt i å love god stemning.
– Jørn har ei mektig og rå stemme og tilfører alltid god stemning. Så at han no kjem og kan by opp til allsong er heilt topp, seier Bugjerde.
Andrea stiller med ny musikk på sin tredje opptreden på festivalen
– Krutsterk headline
Med Jørn Trollebø Kvalheim er artistrekka til årets festival på plass. Sjølv er «lokalpatrioten» minst like gira på det som skal gå føre seg på scena som når han ikkje skal stå der sjølv.
– Det er jo ei krutsterk headline! Ikkje minst er festivalen veldig variert med alt frå Kjartan Lauritzen til legender som DumDum Boys og Stage Dolls. Så eg kjem nok til å stå på første rad og høyre på fleire av dei om eg får moglegheita, seier han engasjert.
– Det er nesten uverkeleg at dette bandet kjem til Strandfestivalen
Kjem truleg med nokre overraskingar
Dei som kjenner til Jørn og musikken hans kjenner nok også godt til songtekstane. Dei som har vore på konsertane hans veit også at han ikkje er redd for å sette i gang litt allsong. Men om alle tekstane kjem til å sitte like godt denne gangen er ikkje sikkert.
– Du treng kanskje ikkje å skrive det. Men du kan få lov til å lokke litt, seier han til Fjordenes Tidende.
Vi får då lokke med eit sitat av ein av Jørn sine favorittar, nemleg Dave Grohl i bandet Foo Fighters.
«My songwriting is like extending a hand to the listener».