– Vi vil starte opp ein kampanje der vi ønskjer å få ungdom til å ta eit kurs som gir dei god informasjon om antidopingreglar, helsekonsekvensar, kosttilskot og dopingkontrollar, fortel Torill Eide Tennebø ved Måløy Treningssenter.

TV2 har nyleg skrive ein artikkel der det kjem fram at Dopingkontakten, som er ei anonym telefonteneste som folk kan ta kontakt med om dei har spørsmål knytt til temaet, har fått ei kraftig auke i tal førespurnadar. I saka kjem det også fram at ifølge Tolletaten var det i 2022 cirka 1.600 beslag av dopingmiddel.

– Mange ønskjer nok raskare resultat av treninga, og då kan det bli freistande å ta den snarvegen, seier Eide Tennebø.

Påverka av sosiale medium

Ho viser også til påverknad frå sosiale medium.

– Mange blir nok påverka av før og etter-bileta vi får opp i feeden vår. Mange hevdar at resultata kjem etter til dømes eit 12 vekers treningsprogram, men i mange tilfelle er ikkje dette reelt. Men det er sjølvsagt vanskeleg å ikkje bli påverka, seier Eide Tennebø.

Ungdata si undersøking frå 2021, der 603 elevar på ungdomstrinnet i Kinn deltok, viser at 30 prosent trener på treningssenter, og NRK skreiv nyleg at 2022 var året med det høgste målte gjennomsnittstalet for unge som trente.

Eide Tennebø er glad for at mange vel å trene på treningssenter og seier dei er bevisst det ansvaret dei har for å ta godt vare på dei som kjem til senteret. Ho meiner det er viktig å hugse på at alle har ulike utgangspunkt, ulike kroppar og ulike mål med treninga.

– Vi som treningssenter har ein bevisst strategi knytt til korleis vi jobbar i sosiale medium. Vi ønskjer å fremje helseaspektet ved trening, og ikkje utsjånad.

Startar kampanje

Antidoping Norge rapporterer om auka førespurnadar, men også at alderen på dei som tar kontakt med Dopingkontakten går nedover.

– Det er ei utvikling som går i feil retning. Difor ønskjer vi å bevisstgjere ungdom lokalt. Vi gjer det ikkje fordi vi opplever at det er eit problem her, men det er naivt å tru at ingenting føregår på vårt senter.

Måndag startar dei difor ein kampanje som handlar om å få ungdomen til å ta eit kort kurs. Kurset er på nett og har fire modular; antidopingreglar, helsekonsekvensar, kosttilskot og dopingkontrollar. Her er det faktainformasjon, små videosnuttar med informasjon og avkryssingsspørsmål. Til slutt får ein ein diplom.

Og dei som tar kurset og legg ut eit bilde av seg sjølv i sosiale medium med kursbeviset kan vinne årsabonnement på treningssenteret.

– Det er utruleg viktig å få ut informasjon. Brukar ein ulovlege stoff kan det skje utruleg mykje med kroppen både fysisk og psykisk og ein kan få seinskadar, seier Eide Tennebø, og held fram:

– Får vi ein person til å revurdere noko som ikkje er innafor, så er det verdt ein kampanje.

Eide Tennebø oppmodar folk om å ta kontakt med Dopingkontakten eller dei tilsette på treningssenteret om dei har spørsmål om temaet.

Har verktøy

I 2017 vart Måløy Treningssenter reint senter.

– Det handla om at vi ville ta eit standpunkt der vi markerer at doping og bruk av ulovlege preparat er noko vi ikkje aksepterer på vårt senter.

At Måløy treningssenter er reint senter betyr at alle som startar eit medlemskap hos treningssenteret må krysse av for at dei inngår ei avtale med Antidoping Norge om at dei trener på eit reint senter, og at ein ved mistanke kan bli testa for bruk av ulovlege preparat.

– Det er ikkje slik at vi på senteret vil gå rundt og hente inn folk til test, men vi har verktøy for å handtere slike situasjonar, seier Eide Tennebø.

Ved mistanke blir ein kalla inn til ein samtale, og er ein under 18 skjer samtalen saman med føresette. Så må ein akseptere å la seg bli testa, nektar ein, kan ein bli utestengt frå senteret. Det er Antidoping Norge som utfører dopingtestane. Får ein positiv test vil ein bli meld til politiet.

– Eg trur ikkje at vi har mange på vårt senter som tenker at dei skal bruke noko ulovleg, men vi har nok ein del som er i den kategorien at dei ønskjer å booste resultatet sitt med proteinpulver, pre workout, kreatin eller andre tilskot. Det er lovleg, men spørsmålet er om du har bruk for det, seier Eide Tennebø

Ho viser til at dette er eit tema dei snakkar om med dei som trenar gjennom ordninga Etter skuletid, som er for ungdomar som er frå 13 år og oppover.