Vi ønsker kvarandre ei god jul, og tenker kanskje ikkje så mykje over kva som ligg i denne helsinga.

Det er nok ulike oppfatningar til kva som er ei god jul, og det heng saman med forventningane. For at jula skal vere god må ho leve opp til alle forventingane ein har opparbeidd i tida før jul. Og her legg ein lista ulikt. Det blir snakka om at ein skal legge ned ambisjonsnivået, men det kan sjå ut som ikkje alle greier det.

Julehøgtida legg opp til fellesskap, glede og godheit mellom menneske. Dette er gode verdiar, men det krev at ein er fleire. Nokon av oss er åleine, også i julehelga. Nokon likar kanskje å vere åleine, men for nokon er det med både sakn og sorg ein er åleine.

I jula er det eit ekstra fokus på å inkludere og glede medmenneska rundt seg. Røde Kors og Frelsesarméen er nokon av dei som stiller opp og gjer ein stor og viktig innsats, men dei minner oss om at einsemd og utanforskap også er her mellom nyttår og jul, altså gjennom heile året. Det er ei viktig påminning!

Sjå og ta vare på medmenneska du har rundt deg i lokalsamfunnet, heile året.

Fjordenes Tidende har i desember delt ut julestjerner til mange som har spreidd glede og stilt opp for andre. Takk til alle som har sendt oss tips!

Det er mange i lokalsamfunnet vårt som gjer så mykje for andre og verkeleg fortener ei julestjerne.

Om vi ikkje får takka alle med ei julestjerne, vil vi uansett her og no takke alle gode medmenneske som gjer noko til glede for andre. Tusen hjarteleg takk!

Fjordenes Tidende har lyst til å vere eit godt selskap i jula. Derfor kjem vi ut med ei ekstra fyldig juleavis med mykje variert stoff som vi håpar de vil ha glede av i julehelga. De skal vite at det ligg kjærleik til lesarane våre i kvart einaste tastetrykk.

I romjula kjem det ut ei papiravis, fredag 30. desember. Fjt.no tek ikkje juleferie, og vi vil vere saman med deg gjennom heile jula.

Vi i Fjordenes Tidende ønsker alle saman der ute ei god og fredeleg jul!